Los arqueològs a mand de trobar un segon campament viking en America

Lo campament, conegut coma Hóp e mençonat dins las sagas vikingas pendent de sègles, poiriá èsser trobat lèu

 

Escrich per Christian Andreu 

Fins a uèi lo jorn lo sol campament viking jamai trobat sus continent american es l’Anse aux Meadows, en Tèrra Nòva. Òr, un segond campament, conegut coma Hóp e mençonat dins las sagas vikingas pendent de sègles, poiriá èsser trobat lèu. Una celèbra arqueològa trabalha per lo trobar dins una region del nòrd-èst del Nòu Brunswick qu’a de vinha salvatja e de salmons, e ont los natius americans fasián de canoas amb de pèls d’animals.

Un segund campament viking, conegut com Hóp e 

mençonat dins las sagas vikingas pendent de sègles, 

poirà èsser trobat lèu.

Se Hóp foguèsse descobèrt, seriá lo segond campament viking descobèrt en tèrras americanas. L’autre, l’Anse aux Meadows, es situat dins lo nòrd de Tèrra Nòva. Aquò arriba après de decennis de recèrca de la comunautat arqueologica qu’a cercat en Tèrra Nòva, mas tanben dins l’Illa del Prince Edoard, dins lo Nòu Brunswick, en Nòva Escòcia, Maine, Nòva Anglatèrra e Nòva York. Totun, l’arqueològa qu’es mai prèp de lo descobrir, Birgitta Wallace, a utilizat la descripcion de las sagas vikingas e lo trabalh fach a L’Anse aux Meadows, mas tanplan en divèrses luòcs d’ancians campaments de natius americans. Per ela, Hóp se poiriá trobar dinsn la region de Miramichi-Chaleur.
 
“Pensi que poiriá èsser ailà –çò diguèt Wallace a la revista numerica Live Science–. Totun, seriá pas un vilatge mas mai d’un pr’amor que la localizacion auriá cambiat cada an: las sagas èran dichas oralament e aquò auriá provocat d’errors sul sit. I auriá agut aital plusors luòcs e non un sol sit”.
 
 
 Una recèrca prigonda
 
Segon aquela arqueològa, lo Nòu Brunswick seriá lo sol luòc ideal segon los critèris de las sagas. I a de vinha sauvatge e de salmons, una barrièra de sabla e una populacion nativa qu’utilizava de canoas amb de pèls d’animals. I a pas pus de vinha dins l’Illa del Prince Edoard o en Nòva Escòcia. A mai, i a fòrça barrièras de sabla sus sa còsta èst.

En mai d’aquò, una recèrca realizada per l’arqueològa Catherine Carlson confirmèt que i aviá pas de salmons abans 1500 en Maine o Nòva Anglatèrra, mas si sul territòri dels Mi’kmaq dins la region de Miramichi-Chaleur, ont lo salmon èra tant abondós que los Mi’kmaq avián aquel animal coma totèm.

Segon Wallace, a L’Anse aux Meadows foguèron trobadas de fruches d’una espècia d’arbre originària de Nòva Brunswick. E tanben mai d’una grana d’aquela region. 

Mas de localizar Hóp seriá de mal far. Èra mai un campament –o plusors– d’estiu qu’un vilatge. Foguèt utilizat solament mai d’un mes per an, e a la fin de l’estiu los vikings se n’anavan totjorn vèrs Groenlàndia o L’Anse aux Meadows. Segon las sagas èra un luòc per culhir de fusta e manjar, e aquò laissa pas gaire de vestigis arqueologics. Lo païsatge de Miramichi-Chaleur a cambiat e i poiriá aver dins lo meteis sit una autoestrada. L’estudi, escrich per Wallace, es estat tanben publicat dins la revista Canada’s History.

[Poblejat dins www.sapiencia.eu]